Севернокорејскиот лидер Ким Џонг Ун ги предупреди челниците на владејачката Работничка партија дека земјата поминува низ тешка економска криза.
Тој повика на воведување итни мерки за подобрување на ситуацијата, пренесоа локалните медиуми.
Во текот на викендот беше одржано пленарно заседание на партијата, неколку дена пред истекувањето на ултиматумот што Северна Кореја им го постави на САД во преговорите за денуклеаризација.
Пјонгјанг вети дека ако до крајот на годината нема напредок во преговорите, Вашингтон ќе добие „божиќен подарок“.
Ким, кој претседаваше со заседанието, предупреди дека е време да се донесат важни одлуки во врска со економскиот развој на земјата.
На претставниците на партијата им дал „задачи“ кои треба да се спроведат „за да може итно да се подобри ситуацијата во стопанството“, пренесе севернокорејската новинска агенција KCNA.
Северна Кореја никогаш досега не објавила економски статистички податоци, а единствените информации за стопанството во земјата обично доаѓаат од странство.
Јужнокорејската Централна банка во јули годинава извести дека економскиот раст на Северна Кореја, земја погодена од меѓународни санкции, е намален за 41% во текот на 2018 година, што е најголем пад од големата криза во 90-тите.
