Со години научниците сметаа дека нашата галаксија е релативно рамна и стабилна, но најново шокантно откритие покажа дека Млечниот Пат е заоблен на краевите.
За прв пат, научниците точно ја мапираа нашата галаксија за да го добијат нејзиниот вистински облик, објави Independent.
Другите галаксии ги имавме детално измерено, а мерењето на нашата беше вистински предизвик, објаснуваат астрономите и додаваат дека тоа е како да се обидувате да одредите каков е обликот на сопствената држава додека стоите во својот двор.
„Главно, спиралните галаксии ги доживувавме како рамни, како Андромеда која можеме да ја набљудуваме со телескоп“, вели професор Ричард де Гријс, астроном и коавтор на студијата.
Во оваа студија беа анализирани 1.339 ѕвезди за да се открие вистинскиот облик на галаксијата и беше воочено дека ѕвездениот диск се заоблува нагоре како што се приближувате кон неговите краеви.
На некој далечен набљудувач нашата галаксија би му изгледала како диск од ѕвезди кои орбитираат околу густо јадро. Но, на краевите влијанието на гравитацијата е послабо и тој диск наликува на буквата „S“.
Новото истражување покажува дека за искривениот облик на галаксијата е заслужна и моќната ротациска сила на масивниот внатрешен диск.
Астрономите претходно имаа забележано галаксии со сличен облик со заоблени краеви, но досега не знаевме дека и Млечниот Пат се вбројува во нив.