Најдобриот македонски голман Столе Димитриевски потпиша продолжување на договорот со шпански Рајо Ваљекано кој сезонава игра во втората лига.
Македонската единица го брани голот на клубот од мадридското предградие од 31 август 2018 кога на последниот ден од преодниот рок замина таму од редовите на Жимнастик. Иако имаше периоди кога беше седнуван на клупата како резервен голман, сепак самиот тој вели дека е задоволен од престојот во Рајо. Неговиот договор сега има важност до јуни 2024 година.
„Многу сум задоволен што го продолжив договорот. Среќен сум тука. Многу ми се допаѓа тука во Рајо. Многу сум задоволен од клубот, од луѓето кои работат тука, од моите соиграчи и поради тоа сум среќен овде“, вели Столе.
Откако Рајо лани испадна од Ла Лига, сезонава настапува во Сегунда и не му оди добро бидејќи по 25 кола е на 11-тото место, но има 3 бода помалку од последното место кое води во плеј-офот за пласман во Ла Лига.
Во првите 7 кола Столе беше резервен голман, но потоа откако неговиот колега Алберто Гарсија го повреди коленото Столе се врати помеѓу стативите.
Со продолжувањето на договорот Димитриевски ќе добива поголема плата, но и Рајо ќе добие поголема отштета доколку дојде до трансфер. Со оглед на тоа што го прикажува, а и тоа што досега веќе имаше неколку понуди, би било чудно доколку Димитриевски навистина остане во Рајо до 2014 година.
Столе веќе неколку години е прв избор во македонската репрезентација за која има одиграно 34 натпревари и е трет голман со најмногу настапи зад Петар Милошевски (59) и Томе Пачовски (46).
