Иако Килјан Мбапе трипати му ја затресе мрежата во финалето, аргентинскиот голман Емилиано Мартинес во соблекувалната славјето го искористи за да му се потсмева во младиот Французин и предизвика бурни реакции на социјалните мрежи.
Мартинес веќе навлече негативни критики со потегот откако му беше доделена наградата Златка ракавица за најдобар голман на Мундијалот приредувајќи непристоен гест на бината кој го обиколи целиот свет. Мартинес ракавицата ја испружи над шорцевите на местото на половиот орган.
Сега со снимката која излезе од аргентинската соблекувална (ја објави Николас Отаменди) повторно собра лавина негативни критики.
Имено, додека Аргентинците славеа парадирајќи низ соблекувалната со популарното вовче, Мартинес ја прекина песната викајќи: „Минута молк за Мбапе“, по што возот повторно тргна и славјето продолжи.
Потегот на Мартинес е само продолжување на препукувањата помеѓу него и Мбапе, што трае веќе неколку месеци. Прво Французинот истакна дека екипите од Јужна Америка се послаби од оние од Европа бидејќи не играат на исто ниво, на што аргентинскиот голман му врати дека „нема поим од фудбал“ и дека тоа што го зборува нема никаква смисла.
Сепак, двајцата можеби на зборови не се сакаат и почитуваат, но вистината очигледно е далеку од таква. Камерите на стадионот „Лусаил“ фатија топол поздрав помеѓу двајцата кој беше инициран токму од Мартинес и тоа пред минутата молк што ја направи во соблекувалната. Ова се случи пред церемонијата со доделувањето на медалите.
Мбапе синоќа постигна хет-трик против Аргентина, но само еден гол му беше од активна игра, а два од белата точка. Беше прецизен и во пенал-рулетот. Сепак, на крајот се радуваше Мартинес бидејќи Аргентина славеше по изведувањето пенали.