Голманот на ПСЖ Серхио Рико се здоби со тешка повреда додека јавал во неделата и моментално е во болница каде според шпанските медиуми е приклучен на апарати.
Тој беше тешко повреден во несреќата што се случи во Андалузија, откако неговиот коњ се судрил со друг, побегнат коњ. Паднал на земја и добил дополнителен удар со копито во главата.
„Тој е во сериозна состојба“, изјави во неделата портпаролот на ПСЖ.
Се наведува дека здобиените повреди биле дури и опасни по живот, а на Рико му биле скршени пршлените на вратот и се здобил со потрес на мозокот.
За негова среќа, помошта пристигнала многу брзо и со хеликоптер бил пренесен во болница во Севиља.
Се додава дека повредите биле толку сериозни што дури бил ставен на апарати за одржување во живот, а околностите на несреќата и тоа што се судриле два коња и дека и после тоа бил удрен, укажуваат дека голманот на ПСЖ се нашол во навистина несреќна ситуација.
Се наведува и дека следните 24 часа ќе бидат одлучувачки за проценка на неговата состојба.
Поранешниот голман на Севиља му се приклучи на францускиот тим во 2020 година, откако претходната сезона ја мина на позајмица во Фулам. Од доаѓањето во ПСЖ има 29 настапи за овој тим.