Македонските фудбалски репрезентативци Горан Пандев и Енис Барди се запишаа во листата на стрелците за своите екипи на вчерашните средби од италијанската Серија А и шпанската Ла Лига.
Пандев одигра 74 минути за Џеноа и го постигна првиот гол во триумфот над СПАЛ (2:0) и негов деветти во тековната сезона. Оваа победа за Џеноa е многу важна во борбата за опстанок.
Џеноа по 32 натпревари има 30 бода и е едно место над линијата од опасната зона, но конкурентите за опстанок, допрва треба да ги одиграат своите дуели од оваа рунда.
За разлика од тимот на Пандев, екипата на Леванте за која игра Барди, загуби со 1:2 од Атлетик Билбао, но нивниот опстанок во најквалитетното шпанско фудбалско првенство не е доведен во прашање.
Сепак, нашиот репрезентативец Барди постигна гол на оваа средба, единствениот за неговата екипа.