IT гигантот Google ќе забрани рекламирање на содржини поврзани со криптовалутите од јуни годинава, соопшти компанијата.
Нема да биде дозволено рекламирање на овие производи, вклучувајќи и ICO, дигитални паричници или совети за тргување со дигитални валути преку разни платформи.
Сличен потег најави и Facebook во почетокот на годинава. Компанијата зад популарната социјална мрежа соопшти дека ќе ги забрани сите реклами за биткоин и другите криптовалути за да го спречи рекламирањето и промовирањето на нешто што често се поврзува со измама.
Компанијата Google ги ажурира правилата за рекламирање поврзани со финансиски услуги за да забрани какво било рекламирање на содржини поврзани со криптовалутите, рече директорот на маркетинг Скот Спенсер.
Тоа значи дека ни компаниите со легитимни понуди на криптовалути нема да може да се рекламираат преку кој било Google производ за реклами.
„Немаме кристална топка за да видиме каде ќе се движат криптовалутите, но видовме доволно штета или потенцијални штети и тоа е област на која сакаме да ѝ пристапиме исклучително претпазливо“, рече Скот.
