Google учествуваше во создавањето на најдеталната мапа на врски во човечкиот мозок досега.
Оваа мапа покажува неверојатна количина детали, вклучувајќи модели на врски помеѓу невроните, како и нешто што може да личи на нов вид нервни клетки.
Мапата на мозокот, која е достапна бесплатно на интернет, покажува 50.000 клетки во три димензии што сочинуваат 130 милиони синаптички врски. Податоците се 1,4 петабајти, што е приближно 700 пати поголема од капацитетот на складирање на просечниот модерен компјутер.
„Оваа мапа е толку полна со податоци што експертите сè уште ја немаат испитано детално“, вели експертот Вирен Жан од Google.
„Првпат ја гледаме вистинската структура на толку голем дел од човечкиот мозок“, рече биологот Кетрин Дулац од Универзитетот Харвард.
Мапиран дел од мозокот на пациент со епилепсија
Проектот за мапирање на мозокот го започна Џеф Лихтман од Универзитетот Харвард откако за истражувачки цели доби дел од мозокот на 45-годишна жена со епилепсија отпорна на лекови. На пациентката ѝ беше отстранет левиот хипокампус, што беше извор на нејзините напади. Хирурзите исто така морале да отстранат одреден дел од здравото мозочно ткиво кое го покриваше хипокампусот.
Лихтман и неговите колеги веднаш го зачувале примерокот на мозок и потоа го обоиле со тешки метали како што е осмиум, така што надворешните мембрани на секоја клетка може да се видат под електронски микроскоп. Потоа, тие исекоа дел од мозокот на парчиња со дебелина од околу 30 нанометри, што е околу 1.000-ти дел од дебелината на човечкото влакно, а секој дел го сликаа со електронски микроскоп, пишува New Scientist.
После тоа, целата работа ја презедоа Жан и неговите колеги од Google, склопувајќи ги дводимензионалните делови во тродимензионален волумен. Тие користеа вештачка интелигенција за реконструкција на делчињата што поврзуваат еден неврон со друг и означување на различни типови клетки.
За време на оваа постапка, научниците пронајдоа мистериозни парови неврони длабоко во кортексот.
„Две клетки беа насочени во спротивни насоки на истата оска. Никој не знае зошто“, рече Лихтман.
Подеталната мапа на дел од мозокот можете да ја видите ТУКА.
