Апликацијата Google Messages доби функција за вештачка интелигенција чија цел е да ги заштити корисниците на Android од измами базирани на текстуални пораки.
Новата алатка за откривање измами, напојувана со технологија за вештачка интелигенција, сега се справува со пораки кои првично изгледаат безопасни, но на крајот стануваат опасни за корисникот, се вели во блогпостот на Google.
„Доколку Google Messages се сомнева во измама, ќе добиете предупредување во реално време за да можете лесно да го блокирате и пријавите разговорот. Оваа функција може да ги заштити корисниците пред да изгубат пари или да откријат чувствителни информации“, објасни компанијата, додавајќи дека корисниците нема да мора да се грижат дали нивните разговори ќе бидат јавно изложени, бидејќи измамата ќе биде откриена на уредот.
Како пример, Google објави скриншот од можно сценарио за измама, покажувајќи дека корисникот добива порака од непознат број прашувајќи дали тоа е Мери. Кога корисникот ќе одговори не, испраќачот се претставува како финансиски советник кој тврди дека се обидува да дојде до клиентот со некои информации за инвестирање. Во овој момент, алатката за откривање измами се активира и прикажува скокачка порака која го предупредува корисникот дека пораките се „веројатно измама“ со дополнителна забелешка дека „вообичаените измами често започнуваат на овој начин“.
Google првично ќе ја лансира оваа функција на англиски јазик во САД, Обединетото Кралство и Канада, но има планови да ја прошири и во други земји.
Ова е уште еден обид на Google да ги заштити корисниците од измами. Функцијата е стандардно активна и ги следи разговорите со луѓе кои не се во списокот со контакти на корисникот. Сепак, се поставува прашањето што прави Google со информациите кои корисникот ги открива во сомнителните разговори. Еден разговор можеби не е доволен за да се соберат доволно информации за некоја личност, но неколку може да се искористат за да се создаде профил за корисникот.
