GoPro конечно го претстави долгоочекуваниот дрон Karma, кој подолго време го најавуваше, а во пакет со него го претстави и новиот модел Hero 5, како и посебна рачка за стабилизирање на камерата. Продажбата ќе стартува на 23 октомври, а дронот ќе чини 799 долари. Во пакет со Hero 5 Session цената ќе биде 999 долари, додека со Hero 5 Black ќе чини 1.099 долари.
Главниот адут на дронот Karma е едноставниот начин за користење. Дизајнот на склопување ветува практичност при носење, а во пакетот е вклучен и посебен ранец за дронот. Управувањето е преку едноставниот контролер кој на едната страна има екран на допир, а во другиот дел има два џојстика и копчиња за контрола.
Дронот може да лета со камерите Hero 5 Black, Hero 5 Session и Hero 4, а една интересна опција е гимбалот кој може да се извади од дронот и да се снима од рака.
Камерата на Karma е поставена на предниот дел, што според GoPro ќе ја елиминира можноста роторите да се појават во кадар, нешто што се случува кај дроновите со централно поставена камера.
Апликацијата ќе му овозможи на сопственикот да му даде на друг корисник преглед во видеото што го снима, како и дел од командите, а во пакет со новиот сопствен cloud сервис за складирање податоци, GoPro ќе се обиде да се избори за добра позиција на пазарот на дронови.
[jw: https://www.youtube.com/watch?v=CjNjcrQZtd8]
