Последниот советски лидер Михаил Горбачов наполни 90 години, а веќе со месеци се наоѓа во болнички карантин поради пандемијата со коронавирусот, пренесе Reuters.
По повод роденденот, рускиот претседател Владимир Путин го нарече „исклучителен државник“. Роденденот му го честитаа и американскиот претседател Џо Бајден, британскиот премиер Борис Џонсон и германската канцеларка Ангела Меркел.
Путин порача дека Горбачов припаѓа на групата исклучителни луѓе и државници кои имале големо влијание на домашната и на светската историја.
Додека беше на власт во периодот меѓу 1985 и 1991 година, Горбачов се залагаше за реформи да се постигне отвореност и „перестројка“, а неговата политика доведе до распад на Советскиот Сојуз. Ќе остане запаметен како последниот лидер на СССР.
Во 1991 година доби Нобелова награда за мир и засекогаш се запиша во историјата. Роден е на 2 март 1931 година во сиромашно семејство со руско-украинско потекло.