Повеќе од 700 пожарникари од саботата се борат против шумските пожари кои ја зафатија Португалија по зголемувањето на температурите на Пиринејскиот полуостров. Остатокот од континентот и понатаму се подготвува за големиот топлотен бран кој би требало да пристигне во недела од северна Африка.
Претстојниот топлотен удар ќе предизвика сушен период од Грција до Шведска.
Електричната енергија во петокот стана луксуз во местото Каскаис во близина на Лисабон поради прекумерното користење на клима-уреди, па така неколку илјади луѓе останаа без струја додека надвор температурата изнесуваше преку 43 степени Целзиусови.
Се работи за најголемиот топлотен бран на Пиринејскиот полуостров од 2003 година па наваму. Температурите константно изнесуваат над 40 степени а најголемата беше забележана во саботата, кога на далечниот југ на Португалија беа измерени 47 степени. Со тоа температурите во Португалија стигнуваат многу блиску до највисоката измерена температура во Европа – 48 степени, кои беа измерени во Атина во 1977 година.
Во Шпанија досега починаа три лица од срцеви проблеми настанати поради високите температури во Барселона и Мурсија. Пожари беа забележани и во оваа земја а таму гасењето на пожарите ѝ припаѓа на шпанската војска.