Кафуле во Фиренца е казнето со 1.000 евра откако гостинот се изнервирал поради цената на филџан еспресо. Имено, посетителот повикал полиција и се пожалил дека цената не била прикажана на таблата зад шанкот.
Таа грешка го чинеше барот Ditta Artigianale, познат по своето кафе и победи на неколку натпревари. Инаку, кафето без кофеин го чинело незадоволниот гостин 2 евра во центарот на Фиренца.
Франческо Санапо, сопственикот на кафулето, на интернет се пожали на казната и го бранеше своето кафе кое, како што вели, потекнува од мала плантажа во Мексико и се подготвува со големо внимание. Тој рече дека цената на кафето била прикажана на дигиталното мени.
„Ме казнија затоа што некој се навреди што платил 2 евра за кафе без кофеин. Може ли да поверувате!?“, прашува Санапо на објавеното видео, додека го држи писмото од полицијата.
„И денес, ако некој е дотолку изнервиран и повика полиција, таа казнува по застарениот закон. Овој закон мора да се смени, или во спротивно 99,9% од објектите ќе бидат казнети“, рече тој.
Во Италија просечната цена на еспресото е 1 евро, иако повеќе од 70% од продавниците ги зголемија цените од почетокот на годинава поради ситуацијата со синџирите на снабдување и слабата реколта. Групите на потрошувачи предупредија дека цената на еспресото годинава може да порасне до 1,5 евра.
Санапо рече дека кафулето, кое на Facebook е опишано како „првото италијанско кафуле посветено на квалитетно кафе“, било сметано дури и за револуционерно кога наплатувало 1,5 евра за еспресо кога се отворило во 2013 година. Во нивна одбрана застана и Здружението на мали стопанственици.
И некои од редовните гости го бранеа кафулето.