Што претставува БРТ системот на јавен превоз и зошто Град Скопје го одбра токму овој модел на јавен транспорт како најдобро, најбрзо, најбезбедно и најисплатливо решение за Скопје, беа главните прашања на кои одговори денешната презентација на системот за брз автобуски превоз во Скопје, што се одржа во хотелот „DoubleTree by Hilton“.
На презентацијата присуствуваа градоначалникот Петре Шилегов, помошник директорот на ЕБОР, Иан Џенингс, сообраќајниот експерт од областа на јавен градски превоз, Никола Крстаноски, сообраќајниот експерт за БРТ, Градимир Стефановиќ, генералниот менаџер на израелската компанија ROM Transportation Engineering (רום הנדסת תחבורה), Моше Хирш, потпретседателот на Владата на Република Северна Македонија, Љупчо Николовски, претседателката на Советот на Град Скопје, Љубица Јанчева, градоначалници и претставници од невладиниот сектор.
„Воведувањето на БРТ системот на брз автобуски превоз во Скопје е еден исклучително важен и голем историски чекор напред во урбаниот развој на градот. Целта на денешната презентација е да се обидеме да креираме јасна претстава за јавноста, пред сѐ за граѓаните како главни актери во урбаната мобилност, за тоа што претставува БРТ системот и зошто го одбравме токму овој модел на јавен транспорт како најдобро, најбрзо, најбезбедно и најисплатливо решение за Скопје како главен и најголем град во нашата држава. Со нас денеска се четворица врвни експерти со респектабилен меѓународен углед кои се можеби најдобриот избор на луѓе кои многу добро ја познаваат проблематиката на урбаниот јавен транспорт на патници, со огромно искуство во оваа област од повеќе различни градови во светот. Граѓаните имаат право да ги знаат сите информации за тоа на кој начин се развива градот во кој живеат и колку ќе се подобри квалитетот на живот со подобрувањето на урбаната мобилност преку воведување на БРТ во Скопје“, рече градоначалникот Шилегов во своето воведно обраќање пред присутните на денешната презентација.
Тој нагласи дека е горд што Град Скопје почнува нова историја во јавниот транспорт кој ќе гарантира позитивно влијание во заштитата на животната средина и подобрувањето на квалитетот на воздухот.
Според помошник директорот на Европската банка за обнова и развој од Лондон, Иан Џенингс, ЕБОР секоја година вложува 250 милиони евра во развој на градски транспортни системи.
ЕБОР и Град Скопје веќе соработуваа при набавката на 33 нови MAN автобуси на гас, изработката на акцискиот план за зелен град, како и на Студијата за оптимизација на мрежите на линии на автобускиот јавен превоз. Сега се радувам на соработката при воведувањето на БРТ во Скопје кој е еколошки проект, пристапен за сите граѓани. Ваков проект кој ќе го трансформира превозот во Скопје бара голема посветеност и соработка“, рече Џенингс.
За потсетување, со БРТ се воспоставуваат две линии со коридори резервирани само за ултра-еколошки автобуси - од Ѓорче Петров до Ново Лисиче и од Бутел до Кисела Вода. Трасата со правец запад-исток е во должина од 12,8 км во една насока, со 21 станица, а трасата со правец север-југ е во должина од 10,4 км и 20 автобуски станици. Проектираната вредност за овие две рути е околу 70 милиони евра, што подразбира и набавка на возилата.
Фото: Град Скопје