Македонските олимпијци се сместени во градот Чигасаки, а тамошниот градоначалник се погрижи целиот град да е во знакот на црвено-жолтите претставници.
Градот Чигасаки (茅ヶ崎市) е еден од помалите јапонски градови со 242.798 жители. Се наоѓа во префектурата Канагава, јужно од Токио, домаќинот на Олимпијадата.
Градоначалникот Хикару Сато сними видео порака во која на македонските олимпијци им посакува топло добредојде во неговиот град и им порача дека бидејќи се нивни гости целиот град ќе навива за нив.
„Јас сум Хикару Сато, градоначалник на Чигасаки. Градот Чигасаки е домаќин на Северна Македонија за Олимписките и Параолимписките игри 2020 во Токио. Се надеваме дека ова пријателство ќе го продолжиме и во иднина. Се надевам и дека Македонците ќе го посетат Чигасаки. Жителите на Чигасаки, како и јас, ќе навиваат за олимпијците од Република Северна Македонија“, вели градоначаникот, а потоа пораки испратија и заменик-градоначалникот Коџи Киши и претседателот на Извршниот комитет на Чигасаки 2020, Хироши Ишида.
На видеото му се придружија и жители на градот кои се љубопитни за непознатата земја од каде во нивниот град дојдоа олимпијци. Деновиве жителите на Чигасаки на разни начини се информираат за Македонија, нејзините знаменитости и специјалитети, па можеби во иднина ќе бидеме посетени од туристи токму од овој град.
Сато се погрижи и автобусите од градскиот превоз да возат рекламирајќи ги нашите натпреварувачи.
