Грција ги казни сопствениците на барови и ресторани кои незаконски ги окупираат плажите со лежалки и маси со повеќе од 350.000 евра за само пет дена, објави грчката влада.
Официјалните лица неодамна суспендираа три „нелиценцирани“ плажи кои работат без соодветен договор, соопшти Министерството за економија.
Властите истражија „повеќе од 1.000 поплаки“ од јавноста на туристичките места како што се островот Крф, полуостровот Халкидики и Атика, регионот околу Атина, во обид да се справат со прекумерниот туризам.
Минатата година Грција ја посетиле рекордни 33 милиони луѓе, пет милиони повеќе отколку во 2022 година.
Атина ги сузбива непријателските туристички практики со надзорни дронови, сателитски снимки и специјална апликација „MyCoast“ на која луѓето можат да упатат поплака или жалба.
Грците можат да се јават и да пријават илегална окупација на плажа.
Според новите правила воведени во март, чадорите и лежалките мора да бидат оддалечени најмалку четири метри од морето. А на плажите кои имаат помалку од четири метри песок не е дозволено изнајмување.
Повеќето казни се ограничени на лежалки и чадори кои заземаат премногу простор на плажата, соопшти владата.
Владата презеде акција откако локалното население на југоисточниот остров Парос започна протести наречени „Бунтот на пешкири за плажа“ барајќи слободен, непречен пристап до плажата.
Демонстрантите го осудија присвојувањето на многу плажи од страна на компаниите кои користат чадори и лежалки кои се издаваат секој ден, некои по високи цени.
„Нашата цел е да ја заштитиме животната средина и правото на граѓаните на слободен пристап до плажата и да го зачуваме нашиот туристички производ, како и здравото претприемништво“, се вели во изјавата на министерот за економија Костис Хадсидакис.
Дронови ќе летаат над познатите острови Киклади и Додеканези во близина на турскиот брег во текот на следните неколку дена за да ги означат можните прекршувања.
