Атина, 26 мај 2019 (МИА) - Околу 10 милиони гласачи денеска во Грција одбираат членови на Европскиот парламент, градоначалници, префекти и членови на општинските и регионалните совети, па според тоа, за гласачите ливчиња поставени се четири гласачи кутии, во две простории, јави дописничата на МИА од Атина.
Гласачите места беа отворени во 7 часот утрово и процесот, за сега, се одвива мирно. Правото на глас го остварија лидерите на сите големи грчи политичи партии, но и претседателот и премиерот на Грција, Прокопис Павлопулос и Алексис Ципрас.
Дописничката на МИА од Атина, посети основно училиште во центарот на Атина и поразговара со граѓаните кои претпладневно го остварија нивното право на глас. Велат дека имаат различни критериуми во однос на гласањето. Едни гласаат за партијата која што ја поддржуват со години, други одбираат личности, трети решаваат согласно актуелните случувања во земјата.
-Во животот се информирам за две работи: за историјата и за политиката и врз основа на тоа гласам. Нормално, сакам да се сменат некои работи во земјата, бидејќи и јас имам иднина пред мене, не само вие младите, вели повозрасен Грк за МИА.
-Најважниот критериум за мене е да го одберам најдобриот од најлшоите. Бидејќи, се извинувам, но сите се за никаде, коментира една Гркинка.
-Гласав за партијата што има цврсти и стабилни ставови. И јас сум со непроменети позиции, на мене не влијаат одредени секојдневни работи. Знам што гласам и за кој гласам и свесна сум каков резулат ви имале тие за кои што гласам, вели повозрасна Гркинка веднаш откако го оствари нејзиното право на глас.
-Одбрав личности, а не партија. На ист начин гласав и на минатите европски и локални избори, пред пет години, кусо одговара пензионерката Димитра.
Граѓаните велат дека и нивната лична економска ситуација, но и онаа на земјата не се воопшто добри, но не губат надеж и се оптимисти дека за Грција ќе дојдат посветли денови.
Право на глас на европските и локалните избори во Грција имаат 9 922 294 граѓани, 536 920 се нови гласачи, од кои 106 760 се на возраст од 17 години, кои оваа година на прв пат имаат право на глас, односно ќе гласаат и родените меѓу 1 јануари 2002 и 31 декември истата година.
Гласачките места ќе се затворат во 19 часот, а традиционално веднаш по затворањето медиумите во соработка со агенциите за рејтинг ќе објават предвидување на изборниот резултат, односно т.н exit polls, кои доста често го најавуваат победникот.
Првите официјални резултати од Министерството за внатрешни работи на Грција, кое е и надлежно за пребројувањето на гласовите, се очекува да бидат соопштени околу 21.30 и ќе се однесуваат на Европските избори.
На европските избори учествуваа 40 политички партии и коалиции, кои со свои кандидати ќе се борат место во Европскиот Парламент, во кој Грција учествува со 21 европратеник. Гласачите ќе можат да изберат најмногу четворица кандидати, а за партиите да добијат свој претставник во ЕП ќе треба да освојат минимум 3%.
На локалните избори, Грците ќе гласаат за: избор на регионални и општински власти, за избор на префект и членови на регионален совет, за избор на градоначалник и членови на градски совет и за избор на органите за управување со заедницата (советници на заедницата за заедници од над 300 жители или претседатели на заедници за заедници до 300 жители).
Доколку во првиот круг на локалните избори во општините и префектурите ниту една партија или коалиција не добие 50%+ 1 глас, тогаш на 2 јуни ќе се одржи втор круг.
На минатите евроизбори во мај 2014, вкупно седум партии имаа свои пратеници во ЕП. СИРИЗА беше победник со 26,57% и доби шест пратенички места во Европскиот парламент, зад неа беше Нова демократија со 22,72% и пет пратеници, а потоа следеа Златна зора со три, коалицијата на ПАСОК, Река и Комунистичката партија со по две пратенички места и Независни Грци со еден пратеник.
