Тренерот на НБА тимот Сан Антонио Спарс, Грег Попович, го нарече американскиот претседател Доналд Трамп „бездушна кукавица“ по лажните коментари кои Трамп ги имаше за претходните претседатели.
Доналд Трамп предизвика лавина од реакции откако кажа дека поранешните претседатели Џорџ Буш и Барак Обама не се грижеле за своите војници, и дека не им се јавувале на семејствата кога некој од нив ќе загинел.
„Постојано сум изненаден и тажен поради тоа што овој човек го зборува. Но денеска се надмина себеси, клеветејќи ги Буш и Обама дека не се јавувале на семејствата на загинатите војници. Тоа е толкава лага, што и самиот не можам да поверувам што слушам“, изјави Попович.
Грег Попович и самиот е воен ветеран, кој претходно има служено во воените сили на САД, пред да ја започне тренерската кариера. Тој се почувствува повикан да одговори на коментарите на Трамп, со изјава во стил препознатлив за него.
„Човекот во Белата Куќа е бездушна кукавица која мисли дека може да стане голем само ако ги омаловажува другите. Нашиот претседател е патолошки лажго кој постојано кажува невистини, а сега само што го достигна своето ново дно“, додаде Попович.
Попович е чест критичар на Доналд Трамп, неодамна нарекувајќи го неговото владеење „детинесто и недолично“.