Најново истражување покажа дека огромните ледени брегови на Гренланд се топат многу побрзо отколку што сметаа научниците. Исто така, се истакнува дека најверојатно е премногу доцна за да се направи нешто во врска со тоа.
Овие откритија може да ја предвидат катастрофалната судбина за островите и крајбрежните подрачја, пишува CNN, потсеувајќи дека осум од десетте најголеми градови на светот се наоѓаат во близина на крајбрежје.
Мајкл Бивис, професор по геодинамика на Универзитетот на Охајо и главен автор на студијата, вели дека човештвото најверојатно е дојдено до точка од која нема враќање кога станува збор за борба против климатските промени.
„Единствено што можеме да направиме е да се прилагодиме и да го ублажиме понатамошното глобално затоплување, но во секој случај, предоцна е за да поминеме без негативни последици, бидејќи неизбежно ќе дојде до зголемување на нивото на водата во океаните“, вели тој.
Бивис додава дека мразот на Гренланд се топи во циклуси поради природните феномени и истакнува дека зголемените температури го влошиле тој тренд.
Студијата беше објавена минатиот месец во научното списание Nature и покажа дека ледените брегови на Гренланд се топат за 50% побрзо отколку пред индустриската револуција и 33% побрзо отколку во 20. век , што ќе предизвика зголемување на нивото на морињата и океаните ширум светот за околу 7 метри.
Бивис и неговиот тим откриле дека мразот на Гренланд во 2012 година се топел четири пати побрзо отколку во 2003 година и тоа главно во југозападниот дел на Гренланд.