Двајца шведски политичари ја номинираа активистката Грета Тунберг за Нобелова награда за мир за 2020 година.
Ова е втора номинација за оваа награда за шведската тинејџерка која се бори против климатските промени и активно работи на кревање на свесноста за последиците од загадувањето.
Јенс Холм и Хакан Свенелинг, членови на Левичарската партија, денеска соопштија дека ја номинирале Тунберг поради „нејзините напори да ги натера политичарите да ги отворат очите и да не бидат слепи за климатската криза“, како и за нејзините напори „за намалување на емисиите на штетни гасови согласно Парискиот климатски договор“ кои тие ги сметаат за „дела кои придонесуваат за мирот“.
17-годишната Тунберг ги мобилизираше средношколците ширум светот да ја напуштат наставата и да излезат на протестите Fridays for Future на кои се повикува на преземање итни мерки против климатските промени. Овие протести станаа глобално движење во кое се вклучија милиони млади луѓе.
Кој било парламентарец може да номинира некого за Нобелова награда за мир, а лани Тунберг ја номинираа тројца членови на норвешкиот Парламент.
Во 2019 година Тунберг ја доби Алтернативната Нобелова награда и беше прогласена за Личност на годината од списанието Time.
Поднесувањето на номинации за годинашните Нобелови награди заврши на 1 февруари.