Откако оваа сезона не успеа да освои ниту еден трофеј, Антоан Гризман потврди дека летово ќе го напушти клубот од Мадрид. Како фаворит за неговиот потпис се смета Барселона, која беше заинтересирана за Французинот и минатото лето, но уште неколку клубови се надеваат дека имаат шанса за трансфер на светскиот шампион.
Преку официјалниот Twitter профил на клубот, Антоан Гризман им се обрати директно на навивачите на Атлетико Мадрид и ги извести дека од наредната сезона нема да биде дел од составот на нивниот омилен тим.
Иако пред почетокот на оваа сезона потпиша петгодишен договор со клубот, Гризман реши уште отсега да им даде до знаење на навивачите дека летово ќе си замине од Мадрид и ќе си ја побара играчката среќа на некое друго место.
„Сакам да ви кажам дека донесов одлука и ќе си заминам за да искусам нови работи и да имам нови предизвици. Беше многу тешко да го одберам овој пат, но чувствувам дека токму ова ми треба во моментов“, изјави 28-годишниот Гризман.
Слично како и минатото лето, Барселона и ПСЖ се двата клуба кои покажуваат најголем интерес за Гризман, а медиумите сметаат дека неговиот трансфер во каталонскиот клуб е само формалност и ќе се случи уште во првите денови по отворањето на преодниот рок. Во договорот на Гризман стои откупна клаузула од 125 милиони евра, која Барселона е подготвена да ја плати со цел да го направи Французинот дел од составот на Ноу Камп.
