Откако градоначалникот Шилегов најави дека Град Скопје нема да го плаќа долгот на Вардар, се огласи поранешниот капитен Бобан Грнчаров кој обвини дека парите на фудбалскиот клуб завршиле во ракометниот.
Град Скопје нема да го воскреснува Вардар. Со тоа се согласува и Бобан Грнчаров, сега во пензија, а до пред некоја година столб на одбраната на „Црвено-црните“ и воедно капитен.
Тој на својот профил напиша статус во кој вели дека парите кои Вардар ги заработил со историскиот пласман во Лига Европа есента 2017 наместо да завршат во клупската каса, завршиле кај ракометниот клуб, па сега наместо од Град Скопје треба од РК Вардар да се бара парична помош.
„Многу ми е смешно кога гледам коментари Град Скопје да помогне на ФК Вардар. Како прво, Вардар бара помош од Град Скопје кога должи над 2 милиона евра, зашто кога земаа пари од Европа над 5 милиони не кажаа 'Ај ќе поделиме со Град Скопје', за утре-задутре ако ни требаат ќе ни помогнат тие. Вардар е приватен клуб и кога зема пари и кога треба да се дадат пари, едино за ова што се дешава моментално е крив еден човек и тој треба тоа да го реши сам (се надеваме дека денес ќе го реши и Вардар ќе добие лиценца), а второ, парите што ги земаа од Лига Европа се во РК Вардар, така да сега нека бараат помош таму“, напиша популарниот Грне.
Грнчаров од активно играње се повлече летото 2018 година. Кариерата ја почна токму во Вардар од каде летото 2000 се пресели во ОФК Београд. Потоа играше во украинските клубови Металурх и Стал, во Макаби Петах Тиква во Израел, Гент и Лирс во Белгија, АПОЕЛ на Кипар, бугарски Ботев, а од украинска Таврија летото 2014 се врати во Вардар со кој освои три полседователни титули првак на Македонија и еден Суперкуп.