Континент со неверојатни пустини, густи прашуми и навистина богата култура - Африка отсекогаш била извор на фасцинација за многумина.
Од древните Египќани до европските истражувачи во ерата на големи откритија, морнарите инспирирани од желбата да го откријат непознатото и да стекнат богатство пловеа по африканскиот брег, соочени со непредвидливи ветрови, опасни струи и непознати води.
Секој од ’ртовите крај кои минуваа морнарите денес носи приказни за храброст, несреќа и триумф. Еден од најпознатите и најзначајните меѓу нив е секако ’Рт на Добрата Надеж, историски важна точка што го означува преминот меѓу Атлантскиот и Индискиот Океан.
’Рт на Добрата Надеж има богата и интересна историја. Првиот Европеец што го открил бил португалскиот истражувач Бартоломео Диас, кој стигнал до ова стратешки важно место во 1488 година. Поради суровите временски услови и силните океански струи кои ја отежнувале навигацијата, Диас го нарекол ’Рт на бурите (Cabo das Tormentas).
Сепак, ова име не се задржа долго. Португалскиот крал Иван II одлучи да го смени името во ’Рт на Добрата Надеж за да изрази оптимизам и верба дека овој нов пат ќе овозможи полесен и побезбеден пристап до богатствата на Далечниот Исток. Така, ’Рт на Добрата Надеж стана симбол, не само на географска пресвртница, туку и на надеж за нови можности и просперитет.
’Рт на Добрата Надеж има и застрашувачки прекар - „гробница на бродови“.
Ова драматично име настанало поради бројните бродови кои низ вековите потонале во оваа опасна област. Навигацијата околу неа беше, и останува, особено ризичен подвиг.
Силните океански струи, непредвидливите временски услови и опасните карпи ја претворија оваа рута во кошмар за многу морнари.
Иако ’Рт на Добрата Надеж не е најјужната точка на Африка - таа титула му припаѓа на ’Рт на Иглите (Agulhas) - тој историски го симболизира преминот меѓу Атлантскиот и Индискиот Океан.
Освен по историското значење, ’Рт на Добрата Надеж е познат и по својата неверојатна природна убавина, но и по богатата фауна.
Сместен во националниот парк Table Mountain, овој ’рт привлекува многу посетители кои сакаат да ја истражат неговата единствена природа, историските светилници и остатоците од бродоломи, кои сведочат за турбулентното минато на областа.
