Французинот од тимот на Хас кој имаше страшна несреќа во Бахреин опишува за немилиот настан.
„По ударот се најдов опколен од пламен и ме облеа чувство дека нешто ме притиска на главата. Мислев дека не можам да мрдам, тоа беше еден непријатен момент бидејќи чувствував како моето тело се опушта и ми вели дека умирам. Потоа помислив на моите блиски, сопругата и децата, се обидов повторно, ги завртев рамената и почувствував болка во рацете и стапалата, но успеав да се фатам за халот и да излезам од кокпитот. Потоа еден од придружниците ми помогна и се најдов во амбулантното возило: на сите им изгледаше неверојатно дека сам излегов од тој пламен“, раскажува Ромен Грожан.
„Ме спаси фактот што останав смирен, не паничев. Но, не се чуствувам како херој: херои се докторите кои спасуваат животи. Снимките од несреќата се страшни, но не сум против да се прикажуваат на ТВ“.
Голема улога во бегањето од запалениот болид имал халот, дел за кој многумина негодуваа кога беше додаден на болидите, вклучувајчи го и францускиот возач.
„Халот? Само глупавите водат инат. Го променив моето мислење поради неговата корисност, а тоа му го кажав и на Жан Тод“, вели Грожан.
Тој е оптимист дека ќе се појави на последната трка од сезонава, онаа за Големата награда на Абу Даби која ќе се вози на 13 декември.
„Да се вратам во болидот за последното ГП ќе биде важно, и покрај тоа што за докторите и за мојата фамилија тоа е себична одлука. Но, јас сум пилот: сакам да ја минам целта на последното ГП“.
