Хрватската фудбалска репрезентација во својот втор натпревар од актуелното Светско Првенство Во Русија, со убедливи 3:0 и нанесе тежок пораз на големата Аргентина.
Стрелци за Хрватите беа Анте Ребиќ (53 минута), Лука Модриќ (80 минута) и Иван Ракитиќ (90+1 минута).
Од почетокот ова беше еден груб, нервозен и помалку див натпревар.
Аргентинците удираа, а хрватските играчи, посебно Ребиќ и Манџукиќ, воопшто не останаа рамнодушни и враќаа со иста мерка.
Меѓутоа, откако Анте Ребиќ со прекрасен волеј погоди по катастрофалната грешка на Кабаљеро, распоредот на силите на теренот драматично се промени.
Хрватска во тој момент не застана, не чекаше и не го чуваше резултатот. Всушност, пред голот на Аргентина се редеа напади, а немоќните Гаучоси свесни дека не можат ништо, стануваа се повеќе нервозни и со многу ниски удари, во многу неспортски дух ја завршија средбата.
Најгруб беше Отаменди, кој со топката во непосредна близина, очигледно со намера, го погоди во глава Ракитиќ кој лежеше на теренот. Играчот на Сити за овој срамен потег доби жолт картон од главниот судија.
Аргентинците веројатно очекуваа дека со тие потези ќе ги испровоцираат избраниците на Далиќ, за и тие на грубост да вратат со грубост, но тоа не се случи.
Модриќ и компанијата до крајот навистина ја уништија Аргентина, но со игра, неверојатни потези и прекрасни голови.
Во 80 минута Лука Модриќ со мајсторски удар од далечина погоди за 2:0, а само шест минути подоцна Ракитиќ од слободен удар ја погоди пречката, за потоа во судиското продолжение после контра напад да го постигне третиот гол, како круна за една од најголемите победи во историјата на Хрватска.
Аргентинците до крајот играа уште погруб фудбал, а по натпреварот Лионел Меси си замина во соблекувалната без да му честита на противникот.
Аргентина на овој начин му покажа на светот дека не знае да губи, како и тоа колку се всушност тие навистина мали во порази.