Поранешниот македонски премиер Никола Груевски попладнево на својот Facebook профил потврди дека добил политички азил од Унгарија.
„Судот и обвинителството се претворија во инструмент за политичка уцена и пресмета со политичките неистомисленици, како и покривање на неработењето на владата.
Последните одмазнички притвори на Миле Јанакиески и Кирил Божиновски, кои очигледно се притворени само за владата да ја ублажи критиката по моето заминување од земјата и барање политички азил заради политички прогон, со лажни, фабрикувани и непостоечки докази само ја потврдуваат атмосферата во која денес живее Република Македонија“, пишува Груевски во статусот на Facebook.
Груевски го обвинува премиерот Заев дека истовремено сака да ја реализира распродажбата на националните интереси, да го реализира разграбувањето на државата, да осуди стотици опозиционери и лично Груевски да го затвори и ликвидира.
Во меѓувреме и унгарските медиуми објавија дека Канцеларијата за имиграција и азил утврдила дека се исполнети законските услови за доделување на азил. Од самата канцеларија ова ниту го потврдуваат ниту го демантираат бидејќи, според тамошните закони, таквата информација можат да му ја дадат единствено на засегнатото лице, во случајот Груевски, и на Комесаријатот за бегалци на Обединетите Нации.
