Менаџерот на Манчестер Сити Пеп Гвардиола наводно е тренерот за кој сонува управата на италијанскиот гигант Јувентус.
Sport Mediaset објави дека Гвардиола е еден од тренерите за кои управата на „Старата дама“ размислува во поглед на наследник на Масимилијано Алегри кој можно е да го напушти клубот на крајот на сезоната.
Да се донесе Шпанецот ќе биде тежок чекор, но во фудбалскиот свет сѐ може многу брзо да се смени. Едно е сигурно: Пеп е „тренер од соништата“ за управата на Јуве, тврди Sport Mediaset.
Неговиот брат Пере бил виден во Торино, а италијанските медиуми веќе пишуваат дека преговорите се почнати.
Извори од Англија, пак, тврдат дека доаѓањето на Гвардиола во Јуве не би било преголемо изненадување бидејќи летово клубот ја донесе ѕвездата Кристијано Роналдо.
Гвардиола (47) има освоено титули во Шпанија, Германија и Англија водејќи ги екипите на Барселона, Баерн и Манчестер Сити. Исто така два пати ја има освоено Лигата на шампиони и неколку купови.
