Додека Кристијано Роналдо и Лионел Меси ги „решетаат“ противничките мрежи, тренерот на Манчестер Сити гледа и се воодушевува. Пеп Гвардиола вели дека фудбалскиот свет треба да е благодарен поради присуството на двајца играчи од нивниот калибар и секој треба да ужива гледајќи ги додека уште може.
Во текот на изминатите 10 години, Роналдо и Меси постојано се во окото на јавноста поради игрите кои ги прикажуваат на теренот, а тие и понатаму не застануваат иако се сериозно навлезени во четвртата деценија од животот.
Тренерот на Манчестер Сити, Пеп Гвардиола, ја имаше честа да работи со многу фудбалери во текот на неговата кариера, но како посебен го издвојува Лионел Меси, за кого и понатаму тврди дека е најдобриот фудбалер кој го има видено на фудбалските терени. Тој беше дел од панелот на тренери на настанот Festival dello Sport, кој викендов се одржа во Тренто, Италија.
„Лео е многу компетитивен, тој е нескротливо животно. Но неговиот однос према фудбалот им помага и на останатите играчи да го добијат истиот компетитивен нагон. Тој мрази да губи и во големите натпревари токму тој ја прави разликата, ако тимот знае како да му помогне“, рече Гвардиола.
Најголем ривал за Меси во изминатата деценија, па и денес, претставува Кристијано Роналдо. Иако ја промени лигата во текот на летото, Роналдо продолжува со одличните игри и постигнува голови на секој чекор, а Гвардиола не пропушти да го посочи тоа.
„Живееме во ера во која доминираат Кристијано и Меси, двајца феномени. Веќе 10 години тие даваат по 50 голови по сезона, тоа е неверојатно. Не се работи за една година во која постигнале 50 голови, туку секоја наредна година се случува истото“, додаде Гвардиола.
Како што стојат работите, оваа сезона веројатно ќе бидеме сведоци на прекинување на низата од 10 Златни топки освоени од страна на Лионел Меси и Кристијано Роналдо. Фаворит за престижната награда оваа година е Лука Модриќ, кој успеа да ја однесе Хрватска до финалето на Светското првенство кое се играше летово.
