Манчестер Сити губеше со 2:0 од Астон Вила до 76. минута од последното, 38. коло во Премиер лигата.
Со победата на Ливерпул над Вулверхемптон, тимот од Манчестер ќе останеше без титула. Сепак, за пет минути Илкај Гундоган постигна два, а Родри еден гол, со што избраниците на тренерот Пеп Гвардиола направија пресврт, освојувајќи три бода и ја обезбедија титулата.
На прес-конференцијата по натпреварот, Гвардиола го спореди своето враќање со она на Реал Мадрид во Лигата на шампионите, кога Родриго постигна два доцни гола за продолженијата во кои Сити шокантно испадна. „Се јавив во Реал Мадрид и ми дадоа добар совет“, изјави шпанскиот стручњак смеејќи се.
„Нема објаснување за Мадрид, како што нема објаснување за ова вчера. Беше таков момент, моментум. Понекогаш е добро да се доживеат вакви ситуации. Ќе ни помогне да бидеме посилни следната сезона. Овие момци се посебни. Најдобро е да се победи на домашен терен, со своите навивачи.“