Фудбал

Хари Кејн го намачи Јувентус и постави нов импресивен рекорд во ЛШ

14. февруари 2018 - 11:54 | К.З.

Англиските тимови вчера направија голем чекор кон четвртфиналето од ЛШ, откако Манчестер Сити го совлада Базел со 4:0, а Тотенхем ремизираше 2:2 на гости кај Јувентус. Ѕвезда на вечерта беше Хари Кејн, кој оваа сезона е жива напаст за противничките голмани.

Најдобриот стрелец во Премиер лигата, Хари Кејн, понуди уште еден спектакуларен натпревар и постигна гол во 35 минута, со кој ги мотивираше играчите на Тотенхем да се вратат по дефицитот од 2:0.

Подоцна во натпреварот Кристијан Ериксен додаде уште еден гол за Тотенхем да си отиде од Торино непоразен и со одличен резултат во очи на реваншот кој ќе се одигра на Вембли.

„Можевме да ги наведнеме главите и да потклекнеме откако примивме рани два гола на гости во Лигата на шампионите, во една ваква вечер која почна така лошо. Сепак, го покажавме срцето и карактерот на оваа екипа. Во остатокот од натпреварот одигравме одлично и го надминавме шокот кој се случи во првите 10 минути“, рече Хари Кејн по натпреварот.

Сјајниот напаѓач синоќа постави уште еден рекорд во елитното натпреварување. Имено, Кејн стана првиот играч во историјата на ЛШ кој постигнал 9 голови во неговите први 9 натпревари.

Коментирај