Средноформатните дигитални фотоапарати се стандард во професионалната фотографија бидејќи даваат врвни резултати кои се забележително подобри од оние на стандардните 35 милиметарски DSLR-и. Сепак поради нивната големина и гломазност, најчесто се наменети за сликање во студио, а исто така се и многу скапи со цени од 15-50.000 евра.
Една од најпознатите компании во овој сегмент е Hasselblad, а компанијата сега го претстави првиот дигитален мирорлес средноформатен апарат. Според компанијата, овој фотоапарат има врвен квалитет и цена која е подостапна во однос на стандардните нивни модели.
Verge пишува дека е неверојатно колку е компактен апаратот, а сликањето со него наликува на фотографирањето со стандардните мирорлес или DSLR фотоапарати. Сепак, X1D има предност што има многу поголем сензор.
Фотоапаратот има екран осетлив на допир, и резолуција од 50 мегапиксели, отвор за две SD картички, може да снима 1080р видео, и да фотографира со максимално ИСО 25.600. Hasselblad вели дека нивниот CMOS сензор има динамички опсег од 14 бленди.
Според Verge камерата не е наменета за брза работа, но затоа е идеална за портрети, пејзажи, мртва природа, како и за останатите побавни дисциплини.
Цената на овој модел кој засега е достапен само со два објектива е околу 9.000 евра, а за леќите чинат околу 2.500 евра.