Honda обично привлекува внимание со своите автомобили, но сега фокусот е на еден авион.
Јапонскиот производител го претстави авионот HondaJet Elite II на настанот European Business Aviation Convention and Exibition во Женева, Швајцарија, за кој вели дека е „најбрз во својата класа“, но и достигнува „најголема височина“ и има „најдолг дострел“.
Авионот има композитен труп и карактеристична конфигурација за поставување на моторот над крилото. Овој модел е придвижуван од два мотора GE Honda HF120, од кои секој генерира по 930 кг потисок. Elite II лесно може да полета од писта долга 1.128 метри и да помине растојание од 2.865 километри со 4 патници без застанување. Од Honda велат дека се работи за авион со најголема кабина во класата, кој воедно е и најекономичен.
Стандардната конфигурација е наменета за 6 патници и еден член на екипажот, но има и верзија со 7 патници. Од Honda не открија многу за внатрешноста освен дека е подобрена акустиката, а авионот е опремен со авијациски системи за звук Bongiovi. Волуменот на багажниот простор е 1.756 литри.
Купувачите можат да изберат внатрешност Onyx или Steel, и двата со конфигурација executive club со двобојни кожни седишта што може да се прилагодат за максимална удобност. Внатре има и целосно затворен тоалет, додека самиот ентериер е опишан како „лесен и воздушен“ и „приватен и привлечен“.
Авионот е опремен со авионски пакет Garmin G3000 и автоматизирани системи за мраз, осветлување и притисок. Покрај тоа, Elite II ќе се нуди со функцијата Emergency Autoland, која „автоматски го контролира и приземјува авионот без човечка интервенција“. Системот е дизајниран да ги спасува патниците во ситуација кога пилотот е веројатно онеспособен.
Цените сѐ уште не се објавени, но Honda е сертифицирана од Американската вселенска администрација и очекува да биде сертифицирана и од Агенцијата за воздухопловна безбедност на Европската Унија.
