Кинеската компанија Honor при крајот на минатата година на пазарот го претстави смартфонот Honor View 20, кој за еден месец се продаде во 1,5 милиони примероци. Новиот адут на овој производител се нарекува Honor 20 Pro, а се очекува да биде официјално претставен на јавноста до крајот на месецов.
Според гласините кои доаѓаат од Кина, Honor премиерно ќе го прикаже новиот уред на 25 април.
Она по што би требало да се истакнува Honor 20 Pro e сензорот за камера наречен IMX600 на производителот Sony, кој исто така може да се најде во овогодинешниот флегшип модел на Huawei.
На задната страна на смартфонот на Honor би требало да се најде систем од три камери, од кои: една камера со сензор од 40 MP, една широкоаголна камера од 20 MP и една 8-мегапикселна камера со телефото леќа. Според досегашните информации, уредот ќе има 6,1-инчен OLED екран со сензор за отпечатоци од прст веднаш под него.
Honor 20 Pro ќе работи благодарение на чипсетот HiSilicon Kirin 980, кој се користи и во премиум моделите на Huawei, P30 и P30 Pro. На купувачите ќе им бидат достапни верзии со 6 и 8GB RAM, како и 128 и 256GB внатрешна меморија.
Овој модел би требало да биде новиот хит на Honor, баш поради цената. Тој ќе чини 450 долари, што значи дека ќе биде на пола цена од повеќето флегшип модели на пазарот.