Вчера на официјалниот вебсајт на HTC накратко се појавија детали за веќе најавениот U12 Plus, кој би требало да биде новиот флегшип телефон на оваа компанија. Многу кратко потоа овие податоци беа тргнати, но Роланд Куандт успеа да ги сочува пред да бидат изгубени.
Цената на U12 Plus ќе биде околу 920 долари, со што јасно се дава до знаење дека ова нема да биде телефон кој ќе биде достапен за секого.
HTC U12 Plus доаѓа со импресивни 6GB RAM и внатрешна меморија од 128GB, а значително е да се напомене дека тој, за разлика од многу други смартфони кои излегуваат периодов, нема да го има популарниот notch.
Покрај тоа, HTC се одлучи да не оди со OLED екран, туку наместо тоа овој телефон има вграден 6-инчен WQHD+ Super LCD6 екран со резолуција од 1440 х 2880 пиксели. U12 Plus ќе има и Boomsound звучници, IP68 заштита од вода и прашина, microSD слот за надградба на меморијата до 2TB, батерија со 3.500 mAh, како и Snapdragon 845 процесор во срцето на телефонот.
Официјалното лансирање на HTC U12 Plus треба да се случи утре, но по протекот на толку многу информации, тешко дека ќе дознаеме нешто повеќе кое би нѐ зачудило.
Јасно е дека се работи за телефон кој нема да биде дел од „буџетските телефони“ кои дозволуваат да се заштеди на нив, туку ова е телефон од високата класа. Тој би требало да им биде конкуренција на модели како iPhone X, Samsung Galaxy S9 и Huawei P20 Pro.