Заедно со трите нови телефони, Huawei на вчерашниот настан претстави уште еден новитет: нова мемориска картичка која компанијата ја нарече Nano Memory (NM), која ќе ја замени традиционалната microSD картичка кај најавените модели Mate 20 и Mate 20 Pro.
Од Huawei велат дека NM картичките, кои се идентични по големина и облик како Nano SIM картичките, се 45% помали од microSD картичката и доаѓаат со најмалку 256GB меморија и брзина на пренесување на податоци од 90MB во секунда.
Кај моделите Mate 20 и Mate 20 Pro, NM картичките одат во еден од слотовите за Dual-SIM просторот и корисниците ќе мораат да изберат дали сакаат да имаат повеќе меморија или пак да користат две SIM картички.
Барем засега, NM картичките ќе бидат достапни само за моделите на Huawei, а компанијата не само што ги има единствените телефони кои ги користат ваквите мемориски картички, туку е и единствената која ги произведува.
Многу веројатно е дека во наредните години тие ќе се користат кај многу повеќе производители на смартфони, поради револуционерниот начин на кој се вметнати во физичкиот простор на телефонот – наместо во посебен слот за мемориска картичка, тие можат да бидат вметнати во секој телефон кој ја има опцијата да користи две SIM картички.
Цената и датумот на масовна достапност на NM картичките засега не е позната, но во наредните неколку недели би требало да добиеме повеќе информации од Huawei Околу деталите за овој новитет.