Јужнокорејскиот гигант Hyundai, се огласи по повод шпекулациите дека би можел да ја купи италијанско-американската групација Fiat Chrysler Automobiles (FCA).
Hyundai официјално ги демантира овие шпекулации, во кои пишува дека компанијата од Сеул може да стане мнозински сопственик на еден од најголемите произведувачи на автомобили во светот.
„Овие шпекулации немаат никаква основа“, вели портпаролот на корпорацијата Hyundai, Мајкл Стјуарт.
Меѓутоа, автомобилската јавност не е убедена и смета дека овој демант сепак не значи дека Hyundai навистина не е заинтересиран за ова сценарио.
Се шпекулира дека јужнокорејскиот гигант само чека да падне вредноста на акциите на FCA групацијата, нешто што се очекува да се случи откако Серџо Маркионе и официјално ќе го напушти кормилото на италијанско-американската компанија следната година.
Вредноста на FCA на берзата моментално изнесува 18,89 долари, што е значаен скок во однос на износот од 11,07 долари од пред точно една година.
Последните шпекулации околу спојувањето на Hyundai и FCA доаѓаат од азиските медиуми, кои цитираат неименувани извори за плановите на овие два гиганти.
Ако спојувањето сепак се случи, новата алијанса ќе стане најголем произведувач на автомобили на светот, со 11,5 милиони единици годишно.
Со тоа ќе ги надмине Toyota, Volkswagen групацијата, како и моменталниот лидер - алијансата Renault-Nissan-Mitsubishi.
Веќе одреден период се зборува за можноста некоја компанија да ја купи FCA групацијата.
Најпрво се шпекулираше дека тоа би можел да го стори Volkswagen, кој изрази интерес за Alfa Romeo, потоа кинескиот Great Wall Motors, додека Маркионе се обиде да постигне договор со американскиот произведувач General Motors.
Поради најразличните трговски и геополитички состојби во светот, спојувањето на FCA и Hyundai се чини како најреална опција за сите страни.
