Синоќа на осминафиналниот натпреварот помеѓу Мароко и Малави двете репрезентации испратија по една „бомба“ во противничката мрежа, голови на кои можат да поздавидат и најголемите светски фудбалски ѕвезди.
Уште во 7. минута Габадињо Мханго со топовски удар го изненади мароканскиот голман најавувајќи ново големо изненадување на Африканскиот куп на нации. Анонимниот фудбалер шутираше од 30 и кусур метри од лево, во спротивниот агол лобувајќи го излезениот Јасин Буну, инаку голман на шпанска Севиља.
Мханго е непознат за европските фудбалски љубители бидејќи настапува за јужноафриканскиот клуб Орландо Пајретс и никогаш не играл на Стариот континет. Ова му беше трет гол на африакнскиот континентален собир, па иако 29-годишен, можеби сега ќе се проба и во Европа.
Фаворитот Мароко израмни во втората минута од надополнувањето пред паузата преку Јусеф Ен-Несири, исто така играч на Севиља. Потоа следуваше нова мајсторија.
Во 70. минута ѕвездата на ПСЖ, латералниот бек Ашраф Хакими изведе слободе удар од околу 25 метри упатувајќи милиметарски прецизен удар во горниот десен агол. Голманот Чарлс Тому не можеше ништо да направи освен да го збогати голот со немоќна парада.
Мароко победи со 2:1 и отпатува во четвртфиналето каде ќе игра со победникот од денешниот дерби дуел помеѓу Брегот на Слоновата Коска и Египет.
Инаку, овие два гола дојдоа само ден откако сите веќе прогласија најубав гол на првенството.
Имено, завчера играчот на Комори, Јусуф М'Шангама, постигна еврогол од слободен удар од 30-ина метри против домаќинот Камерун. Неговата репрезентација доживеа елиминација губејќи со 2:1, но неговиот гол уште долго ќе се врти по телевизиите и интернетот.
И сега, како ќе прогласиме најубав гол на толку мајстории?