Volkswagen во јули 2019 година ќе прекине да го произведува легендарниот модел Буба.
Германската компанија порача дека производството ќе го заврши во нивната фабрика во Мексико, откако ќе ги произведат последните модели.
Легендарната Буба има свои корени во нацистичка Германија, кога е создаден „народен автомобил“, но овој модел набргу стана ѕвезда по успешните филмови на Disney, за автомобилот со име Herbie.
Пад на продажбата во последните неколку години
После неколку успешни децении, продажбата забележа пад во последните неколку години, посебно на клучниот американски пазар, бидејќи американските потрошувачи се повеќе се одлучуваат за поголеми автомобили.
Volkswagen, после скандалот во врска со емисијата на штетни гасови на дизел возилата и големата инвестиција во електричните возила, планира да го намали распонот на своите модели, односно својот фокус ќе го стават на производството на семејни и електрични автомобили.
Од компанијата истакнаа дека последните модели на Буба, ќе бидат достапни во купе и кабриолет верзии.
„Прекинувањето со производство на моделот Буба после три генерации, после речиси седум децении, сигурно ќе предизвика низа на емоции кај многу обожаватели на овој легендарен автомобил“, изјави Хинрих Вобекен, извршен директор на американската Volkswagen групација.
Првиот успех дури по Втората светска војна
Создавањето на моделот Буба се поврзува со периодот на нацизмот во Германија, кога таа беше замислена како возило за широките маси.
Но, откако Хитлер и Германија влегоа во крвава светска војна, производството застана, фабриката за производство беше сериозно оштетена, односно падна во рацете на сојузничките сили.
Производството конечно почна да дава резултати во доцните четириесетти години од минатиот век, а до 1955 година, на германските улици имаше милион автомобили.
Дизајнот на овој модел доби меѓународна слава во шеесеттите и седумдесеттите години, во филмовите со Herbie, тркачки автомобил кој мисли со својата глава.
Потоа производството на Буба беше неколку пати стопирано, па повторно оживеано во неколку ситуации после седумдесеттите години.
Редизајнираната Буба ја освои Америка
Редизајнираната „Нова Буба“ од деведесеттите години од минатиот век го освои американскиот пазар, односно тогаш беа продадени повеќе од 80.000 возила во текот на 1999 година.
Компанијата во последните години ја разгледуваше можноста за модернизација и електрични верзии, меѓутоа на крај се одлучија за конечно прекинување со производството на овој легендарен модел.
