Турските медиуми јавуваат дека нивните два клуба добиваат сериозна конкуренција откако во трката по потписот на Езџан Алиоски наводно се вклучил и гигантот Милан.
Откако популарниот Џани не го продолжи договорот со Лидс Јунајтед сѐ поизвесно е дека тој летово ќе има нов клуб. Веќе е јасно дека Галатасарај и тоа како е заинтересиран да го доведе во своите редови, но конкуренцијата се зголемува како што минува времето.
На тимот од Истанбул му се приклучи ривалот Трабзонспор, а гласините велат дека заинтересиран е и Наполи. Сега најнова информација е дека и Милан размислува за неговиот потпис.
Дали е вистина гласината за Милан, не се знае, бидејќи засега известија само турските медиуми кои предупредија на опасноста да нивните два заинтересирани клуба останат без планираното засилување.
Наводно Милан во напиот Џани гледа идеална замена за Тео Ернандес. Било како негова замена при ротација или, пак, во случај Французинот да си замине поради неколкуте богати понуди на негова адреса.
Најпаметно за Алиоски би било да не брза и да почека да заврши со настапи на ЕУРО бидејќи потоа понудите ќе бидат и побогати и повеќе на број. Барем досега токму таа стратегија и ја применува.
