Државниот секретар на Соединетите Американски Држави, Мајк Помпео, верските лидери на Иран ги карактеризираше како „лицемерни светци“, кои собираат големo богатство, додека нивниот народ страда.
„Понекогаш ми се чини дека светот не ја чувствува авторитарноста на иранскиот режим во земјата, како и неговите кампањи за насилство ширум светот, но гордиот ирански народ не молчи за многу владини репресии“, изјави Помпео во претседателската библиотека и музејот Роналд Реган.
Тој рече дека ниту САД, под водство на претседателот Доналд Трамп, нема да молчат, па „по повод 40 години од режимот на тиранија“, тој упати порака до народот на Иран, дека САД ги „слуша, поддржува и дека тие се со нив“, пренесуваат светските медиуми, потсетувајќи дека се ближи 40 годишница од иранската исламска револуција и дека САД повторно подготвуваат воведување на економски санкции кон оваа земја.
Помпео ги критикуваше политичките, правните и воените лидери на Иран, обвинувајќи ги за учество во сеопшта корупција, притоа додавајќи дека иранската влада „безмилосно ги нарушува човековите права, достоинство и основните слободи на сопствениот народ“.
Тој рече дека САД започнуваат кампања на дипломатски и финансиски притисок, за да се прекине со финансирањето, со фокус на повторно воведување на санкции кон банкарскиот и енергетскиот сектор во Иран.
Претседателот Доналд Трамп, во мај ги повлече САД од нуклеарниот договор, а првите санкции се очекува да стапат на сила на 4 август.
