Фудбалерите во клубовите мора да се придржуваат до строго дефинирани кодекси во кои има одредени забрани, а Родриго ги шокираше медиумите откривајќи што му забранил неговиот Реал Мадрид.
Родриго беше прашан од новинарите по победата на Реал Мадрид над Наполи од 4:2 на „Сантјаго Бернабеу“ за преписката со Лионел Меси на натпреварот помеѓу Бразил и Аргентина на „Маракана“ во квалификациите за Мундијалот 2026, а добија навистина неочекуван одговор.
„Не можам да зборувам за тоа. Реал Мадрид не ми дозволува“, изјави 22-годишниот Родриго и веднаш се оддалечи од новинарите.
Да потсетиме, минатата недела Меси најпрвин ги повлече соиграчите од теренот на „Маракана“ поради нередот на трибините пред мечот кога се судрија бразилската полиција и аргентинските навивачи, а потоа Родриго го навредуваше кога Аргентинците конечно излегоа на теренот.
Фудбалерот на Реал ги нарече играчите на Аргентина „кукавици“ по што следуваше брутален одговор од далеку поискусниот Меси.
Меси го фати за врат и му рече: „Ние сме светски шампиони, зошто сме кукавици? Заќути“.
На крајот, Аргентина победи со 1:0 и со тоа му го нанесе на Бразил првиот пораз на домашен терен во мундијалските квалификации во историјата.
