Социјалната мрежа Twiiter вчера соопшти дека од следната недела ќе побара од корисниците да ги отстрануваат објавите со лажни вести за вакцините против COVID-19, следејќи го примерот на Facebook и YouTube.
„Во оваа пандемија, дезинформациите за вакцините се голем и растечки здравствен предизвик - и сите треба да ја одиграме својата улога“, велат од раководството на Twitter.
Twitter може да побара од корисниците да ги отстранат лажните тврдења дека вакцините се користат за да му наштетат или контролираат населението, лаги за наводни нуспојави или теории на заговор како тврдења дека COVID-19 не постои, а со тоа дека нема потреба од вакцинирање против болеста.
Засегнатите од овие мерки ќе треба да ги избришат ваквите објави за да можат повторно да твитаат.
Од почетокот на следната година, социјалната мрежа исто така планира да стави предупредувања под твитовите кои содржат неосновани гласини, како и информации за вакцините кои се непотполни или извадени од контекст. Платформата веќе ги спроведува правилата за справување со дезинформации во врска со коронавирусот, а сега најави и специјални мерки за содржините поврзани со вакцините.
Кампањите за вакцинација започнаа во неколку земји, вклучувајќи ги Велика Британија, САД и Канада, а се очекува наскоро да почнат и во ЕУ.
Уште во октомври, кога вакцините сè уште беа во фаза на клиничко испитување, YouTube и Facebook објавија строги регулативи за забрана на дезинформации за вакцините и кампањите за вакцинација.
