Заменик-градоначалничката на Град Скопје, Бујаре Абази поднесе оставка од функцијата.
Абази, која дојде од редовите на Алијансата за Албанците, образложи дека не сака да биде во коалиција со Демократската унија за интеграција, откако градоначалничката Данела Арсовска вчера назначи петмина директори на градските јавни претпријатија, од кои двајца се од таканаречената „Огнена група“ на ДУИ.
„Целата јавност вчера беше сведок како Арсовска им даваше власт на структури кои со години им нанесуваат тешка штета на Албанците воопшто, и на скопјани особено. Поради овие причини и тие наведени на почетокот, сакам да ја информирам јавноста дека денеска поднесувам оставка од функцијата заменик-градоначалник на Град Скопје и дека актуелното раководство нема да ја има нашата поддршка“, рече Абази.
Од Град Скопје реагираа дека Абази била назначена како „личност која треба да ги застапува интересите на граѓаните“, но „одлучила партијата да ја стави пред интересот на градот и скопјани“.
„Департизацијата во институциите мора да биде постулат врз кој ќе се градат професионални јавни институции, а секој кој партиските интереси ги става над јавниот интерес, јасно е дека не може да функционира во насока на соодветно застапување на скопјани“, наведува Град Скопје во реакцијата.
За потсетување, со ЈП Лајка назначена е да раководи Радмила Пешева, додека со ЈП Улици и патишта Саид Саид. На в.д. директорската позиција во ЈП Паркинг назначен е Крсте Петревски, во ЈП Паркови и зеленила Реџепи Зухејр, додека со ЈП Дрисла назначен е Александар Кузинаков.
Во ЈП Комунална Хигиена продолжуваат со раководство Косана Мазнева, ЈСП Александар Стојковски и ЈП Водовод Марјан Митевски.
Новите в.д. директори ќе имаат обврска и одговорност во следните 6 месеци да ги спроведат неопходните реформи со цел консолидација на јавните претпријатија во периодот кој следи од аспект на справување со економската и енергетската криза. Обврските се во насока на оптимизација на средствата и процесите, намалување на трошоците и кратење на сите непродуктивни трошења, како и спроведување на реформата во сегментот на вработувања во претпријатијата со која нема да се дозволи лица кои не одат на работа или не ги извршуваат работните обврски да бидат платени од буџетските средства, соопшти вчера Град Скопје.
Директорите на ЈП „Улици и патишта“, Борис Настов, на ЈСП Турс, Филип Василевски и на Јавното претпријатие за благосостојба на животни скитници Лајка – Скопје, Воислав Димитровски, на 16-ти месецов дадоа оставки од функциите, поради, како што рекоа, немањето координација со градоначалничката Арсовска.
Претходно оставки дадоа и директорите на „Градски паркинг“ – Скопје, Бојан Христовски и ЈП „Дрисла“, Јане Мицевски откако беше разрешен в.д. директорот ЈП „Водовод и канализација“-Скопје, Златко Перински.
