Иако има 85 години: Иан МекКелен најави враќање во улогата на Гандалф

Не дозволувам некој друг да стави шилеста капа и брада, рече тој за радио BBC Radio 4.

Сер Иан МекКелен навести дека може да се врати во Средната Земја и да ја повтори улогата на Гандалф во неодамна објавениот филм „The Lord of the Rings: The Hunt for Gollum“.

„Ентузијазмот за 'The Lord of the Rings' не покажува знаци на намалување“, рече 85-годишниот актер во интервју за Big Issue. „Само што ми беше кажано дека ќе има уште филмови и Гандалф ќе биде вклучен и тие се надеваат дека ќе го играм. Кога? Не знам. Какво е сценариото? Сè уште не е напишано. Затоа е подобро да бидат брзи“.

Претходно годинава беше објавено дека два нови филма „The Lord of the Rings“ се во развој, а Енди Серкис, кој го играше Голум и во оригиналната трилогија и во филмовите „The Hobbit“, ќе глуми и ќе режира. Првиот од новите филмови, „The Hunt for Gollum“, доби пробен датум на излегување во 2026 година, а сценариото го напишаа сценаристите на „The Lord of the Rings“ Новозеланѓанките Френ Волш и Филипа Бојенс. Во одделно интервју, МекКелен, кој го играше Гандалф во трилогиите на режисерот Питер Џексон, „The Lord of the Rings“ и „The Hobbit“, рече дека не планира да се откаже од улогата.

„Не дозволувам некој друг да стави шилеста капа и брада...“, рече тој во програмата на BBC Radio 4. Покрај тоа, актерот за BBC Breakfast изјави дека нема намера да се пензионира по неодамнешната несреќа на сцената. Во јуни годинава МекКелен падна за време на изведбата на „Player Kings“ во театарот „Ноел Куард“, што резултираше со скршен пршлен и скршен зглоб.

„Ќе продолжам сѐ додека ми работат нозете, белите дробови и умот“, рече актерот кој во мај ќе наполни 86 години.