Златан Ибрахимовиќ во својата нова книга „Адреналин“ откри како се однесувал со своите соиграчи од Милано.
Овојпат станува збор за турскиот играч за врска Хакан Чалханолу и хрватскиот офанзивец Анте Ребиќ.
Чалханолу минатото лето како слободен играч премина од Милан во Интер.
„Треба да му се заблагодариме за сѐ што направи за Милан и да му посакаме сѐ најдобро во иднина. Чалха ја искористи трагичната ситуација. Ериксен имаше проблеми со срцето и на Интер му требаше таков играч и му беше отворена позиција на Хакан. Дотогаш тој немаше понуди од Интер и други клубови. Тој е добро момче, но многу напредуваше поради мене. Стекна храброст и самодоверба“, изјави Ибра.
Тој тврди дека им пратил пораки на Чалханолу и Ребиќ за време на Европското првенство. Златан го пропушти Еврото поради повреда, но на турнирот учествуваа Ребиќ и Чалханолу.
„За време на ЕУРО му испраќав пораки нему и на Анте Ребиќ дека е тешко без мене. Тие ми одговорија со насмевка. Додека не дојдов, Чалханолу воопшто немаше статистика како по моето доаѓање во Милан“.
Анте Ребиќ не се прослави на ЕУРО со Хрватска. По лошата игра на турнирот, тој го нападна селекторот Златко Далиќ, кој потоа не го повика во репрезентацијата.