Напаѓачот на Милан ја прими наградата која позната италијанска емисија ја доделува на популарни личности кои ја одбележале неделата како губитници.
Златен тапир или „Tapiro d'Oro“ е мала позлатена статуетка во форма на животното тапир која популарната емисија „Striscia la Notizia“ на Canale 5 ја доделува на политичари, актери, спортисти и други познати личности кои на некој начин биле јавно понижени или пак доживеале пораз.
Синоќа во емисијата го прикажаа моментот од доделувањето на оваа престижна награда на Златан Ибрахимовиќ кој ја заслужи со поразот во миланското дерби од Интер.
Водителот Валерио Стафели го начека како излегува од автомобил и му ја додели наградата, а Швеѓанецот не се налути, туку ја прими низ смеа.
„Кога нема да победиш, нормално е да си лут. Имам огромна желба за играње фудбал и затоа дојдов во Италија. Одлично ми е тука. Наредниот пат ќе победиме“, рече Ибра кога ја прими оваа „престижна“ награда.
За Ибра ова е трет Златен тапир, па веќе е навикнат да ги добива. „Фала ви за Златниот тапир, чест ми е што го добив. Колку имам до сега? Три? Само не ми кажувај дека ова е рекорд“, смеејќи се прокоментира Ибра.
Златниот тапир се доделува од 1996 година и претставува сатирична награда, но не сите ја примале со насмевка. На пример, американскиот водител од италијанско потекло, Мајк Бонџорно, со сета сила ја скрши од земја секунди откако му беше доделена. Директорот на Rai Uno, Фабрицио Дел Ноче, со микрофон го удри Стафели по лице и му го пукна носот не сакајќи да ја прими наградата. Сето тоа пренесувано во живо на „Striscia la Notizia“.