Швеѓанецот се чувствува дека сѐ уште е во добра форма и не прифаќа еден вирус да му ја заврши кариерата.
Златан Ибрахимовиќ и натаму ќе игра фудбал, но можеби нема тоа да го прави во Милан. Шведскиот ас има голема желба да ја продолжи кариерата и покрај тоа што има 38 години, но од таботот на Милан во моментов немаат намера да преговараат со играчите, барем не додека калчото е во локдаун поради кризата со коронавирусот.
Еден од главните во таборот на „Росонерите“ кој учествуваше со враќањето на Ибра на „Сан Сиро“, Звонимир Бобан, не е повеќе дел од клубот. Сега на потег се Гордон Сингер, Џорџо Фурлани и Иван Газидис, кои едноставно сакаат да добијат на време и да ги дефинираат финансиските бројки за наредната сезона.
Ибра има желба да остане во Италија без разлика дали тоа ќе биде Милан или некој друг клуб. Постои интерес и од други клубови вон Италија, а веќе е познато дека Ралф Рангник имал разговор со Швеѓанецот за да го убеди да се пресели во Лајпциг.
