Шведскиот ас вели дека пензионираниот Бразилец Роналдо е убедливо најдобриот играч во историјата на фудбалот.
Не Кристијано Роналдо, не Лео Меси, ниту пак Пеле или Диего Марадона. За Златан Ибрахимовиќ најдобриот играч во целата историја на фудбалот е оној првиот Роналдо.
„Нема потреба да го опишувам Роналдо, Феноменот“, рече Ибра зборувајќи за Discovery Plus.
„Отсекогаш велат дека постојат играчи кои ја играат играта и играчи кои се играта. За мене, Роналдо е фудбал. Кога го гледавме како игра, сите сакаа да играат како него и да бидат како него“, вели Швеѓанецот.
„Начинот на кој се движеше, начинот на кој трчаше, како изведуваше 'змија'. Само поради стилот на неговото движење тој за мене е најголемиот фудбалер во историјата, без двоумење“.
Роналдо својата професионална кариера ја играше од 1993 до 2011 година. Почна во младинските категории на Саун Кристоваун, а на сениорско ниво дебитираше во дресот на Крузејру. Потоа играше за ПСВ, Барселона, Интер, Реал Мадрид, Милан и Коринчјанс.
Својот зенит го имаше на Мундијалот 2002 кога на Бразил му ја донесе петтата и последна титула светски шампион постигнувајќи 7 голови на патот до пехарот.
Како и самиот Ибра, и Роналдо никогаш не ја освои Лигата на шампионите, пехарот кој му недостасува.