Златан Ибрахимовиќ го затвори музичкиот фестивал Санремо покажувајќи една поинаква страна од себе.
Неговиот говор беше помалку дрзок и поскромен од неговите вообичаени изјави, а шведскиот фудбалер испрати и многу впечатлива порака.
Асот на Милан беше специјален гостин на четири од петте вечери на еден од најстарите музички фестивали во светот, а по тој повод донираше и 200.000 евра во добротворни цели.
На самиот крај, Ибрахимовиќ одржа многу моќен и инспиративен говор.
„Сите го знаеја Златан и пред овој фестивал. Тогаш, зошто Златан дојде овде? Затоа што тој сака предизвици, адреналин, можност да напредува. Ако не си поставиш предизвик, нема да напредуваш.
Кога ќе излезете на терен, можете да изгубите или да победите. Одиграв 945 натпревари, на многу победив, но не на сите. Освоив 11 шампионски титули и изгубив некои. Јас сум Златен и без победа на секој натпревар. Јас сум Златен и кога победувам и кога губам.
Постигнав 500 погодоци, но некои шанси ги промашив. Некои пенали не завршија добро. Но, неуспехот не е спротивност на успехот, неуспехот е дел од успехот. Да не направиш ништо е најголемата грешка што може да ја направиш.
Ако Златан греши, значи и вие можете да згрешите. Важно е да работите на промените секој ден - да бидете посветени, упорни, сконцентрирани. Дојдов на овој фестивал за да ви кажам дека секој од вас може да биде Златан, а јас сум сите вие. Ова не е мојот фестивал, туку фестивал на цела Италија. Ви благодарам, Италија, мојот втор дом“, рече Ибрахимовиќ.
Швеѓанецот не е првиот фудбалер кој се појавил на Санремо – големи фудбалски имиња како Роберт Баџо, Франческо Тоти или Антонио Касано биле гости на овој фестивал пред него.