Подгответе го најмекото месо и згуснете го јадењето без брашно и запршка, а резултатот ќе биде вкусни шницли со грашок.
Јунешките шницли со грашок се вкусно, но и здраво јадење, кое лесно се подготвува, само потребно е малку трпение бидејќи потребно е месото добро да се издинста.
Грашокот е многу здраво и вкусно растение за кое постојат различни начини за негова подготовка во кујната. Сепак, најдобар е овој добро проверен рецепт со јунешко месо. Како што температурите значително опаѓаат, почастете се со вкусно и топло јадење кое се јаде со лажица. Ќе треба да имате малку трпение за јунешкото добро да се издинста, за месото да биде меко и сочно. Верувајте, трудот ќе ви се исплати. Освен тоа, рецептот е навистина едноставен, а бројот на чинии и тенџериња за негова подготовка е минимален. Наместо брашно и класична запршка, јадењето ќе го згуснете со малку млеко и скроб, што ќе му олесни и на вашиот стомак.
Потребни состојки:
- 500 гр јунешко месо
- 20 мл маслиново масло
- 20 гр путер
- 1 главица кромид
- 1 лажица пасиран домат
- 200 гр грашок
- 1,2 л вода
- 100 мл млеко
- 1 лажица пченкарен скроб
- гранче рузмарин
- сол
- бибер
Подготовка:
Јунешкото месо исечете го на тенки шницли, посолете го, побиберете го и прелијте го со малку маслиново масло. Добро втријте ги зачините во месото, убаво да се обложи од сите страни. Оставете да отстои околу половина час. Во тава стопете путер, ставете го месото и пржете од двете страни додека убаво не порумени. Додадете гранче рузмарин. Истурете половина литар вода, поклопете и оставете да се крчка околу половина час. Повремено превртувајте ги парчињата месо, за убаво да се издинстаат од двете страни. Кромидот ситно исечкајте го и додадете го во тавата. Кога кромидот ќе добие боја додадете пасиран домат и грашок. Добро промешајте и истурете ја преостанатата вода, додадете зачини по свој вкус и поклопете да се крчка. Во млекото додадете лажица скроб, измешајте сѐ додека не ја снема и последната грутка, па добиената смеса иструрете ја во тавата. Нека се крчка уште половина час со повремено мешање. Сервирајте додека сѐ уште е топло.
